بسم الله الرحمن الرحيم
ماهو الكندل؟
الكندل هو قارئ إلكتروني أنتجته شركة أمازون ( Amazon ) مزودا بشاشة تعتمد تقنية الحبر الإلكتروني (E-Ink), هذه التقنية صممت لمحاكاة مظهر الحبر على الورق العادي ليكون الجهاز أقرب ما يكون للكتاب العادي.
راح اكتب لكم اليوم عن تجربتي مع جهاز الكندل من عدة نواحي ،وهل يستحق تشتريه أو لا؟
أولاً: سعر الجهاز ومكان بيعه
الجهاز موجود بسعر معقول عند امازون يبتدي من 79.99$ دولار وفيه نسخة بدون اعلانات بسعر 119.99$ دولار طبعاً الاعلانات ماراح تزعجك وتجيك وانت تقرأ، لا فقط مجرد خلفية اذا اغلقت الجهاز ،واذا تبي اريح لك من امازون يمديك تطلبه من سوق.كوم لكن طبعاً بسعر أغلى وماهو متواجد دائماً
ثانياً: الجهاز مع اللغة العربية
هنا نقطة ضعف الجهاز ، الجهازجيد مع الكتب بصيغته (MOBI,AZW...)، لكن المشكلة ان الكتب في اللغة العربية اغلبها PDF وبعضها مايظهر بشكل جيد ،خلنا على الكتب بصيغة الكيندل في مواقع تعطيك هذي الكتب منها ماهو مجاني:[هنداوي ، مكتبة الكندل العربي ، موسوعة الكتب الالكترونية العربية ]
ومنها ماهو مدفوع : نيل وفرات.كوم
اما بالنسبة لكتب الـPDF فأنا اشوف ان افضل حل لها برنامج القص
ثالثاً: شاشة الجهاز وحجمه وبطاريته
اول ما تمسك الجهاز راح تندهش يمكن ما تصدق ان هذي شاشة، لأنه كأنه ورقه ، الجهاز مايعكس الضوء، مريح جدًا للعينين بسبب تقنية الحبر الالكتروني، اما بالنسبة للحجم فهو الحجم المثالي مريح لليد يمديك تمسكه بيد وحده بأعتقادي ان حجمه ممتاز بالنسبة لقارئ الكتروني، بالنسبة للبطارية فهي الشيء الخيالي في هذا الجهاز فهي تقعد معك من اسبوعين إلى شهر تقريباً شاحنه نفس شاحن الجالكسي يجي معه شاحن خاص به لكن بدون فيش كهرباء
رابعاً: تعلُّم اللغة الإنجليزية
للمهتمين بتعلم اللغة الإنجليزية اعتقد ان الكيندل مفيد بدرجة كبيرة من هذي الناحية فإذا كنت محمل القاموس العربي بس تضغط على أي كلمة من اللغة النجليزية يطلع لك ترجمتها باللغة العربية ويحفظ لك كل الكلمات الي ضغطت عليهن في الـvocabulary builder عشان ترجع لها وتشوف حفظتها ولا لا.
رأيي الشخصي
برأيي الشخصي الكندل انصح به للي ماعنده ايباد ويبي يقرأ كت الكترونياً ويوفر فلوس بدال شراء ايباد بأكثر من الف ريال أو يبي يوفر بدال مايشتري كل كتاب من المكتبة وبعض الاحيان يكون غير متواجد يقدر يأخذه PDF مجاني او الكتروني وبسعر معقول والي يبي يتعلم انجليزية، وما انصح فيه خاصة للي مامعه جهاز كمبيوتر لأنه -على حسب علمي- ماراح تستطيع تحمل الكتب العربية الا بالكمبيوتر .
ليست هناك تعليقات:
إرسال تعليق